Лора Паўлава - самабытная сучасная беларуская мастачка. Нарадзілася 2 сакавіка 1979 г. у в. Отар, Чачэрскага раёна, Гомельскай вобласці.
Да 2017 года Лора чакала моманту для ўвасаблення мары аб мастацтве, свабодным самавыяўленні ў ім. Цяпер яна пастаянна стварае, даследуе і ўдасканальваецца ў напрамку абстрактнага жывапісу. Пра сваю творчасць мастачка кажа так: "Мастацтва – гэта ўнутраны кліч,  духоўнае запатрабаванне, паток творчай энергіі, матэрыялізаваны ў карціне".
Ствараючы свае працы Лора Паўлава не шкадуе матэрыялу, яна кажа: "Я выкарыстоўваю столькі фарбы, колькі патрабуе гэтага карціна". Менавіта таму яе працы цікава разглядаць не толькі здалёк, калі ёсць магчымасць разглядзець усё, пачынаючы з урбаністычных пейзажаў і заканчваючы партрэтамі або нацюрмортамі, але і зблізку, бо карціна становіцца матэрыяльным аб'ектам пазнання.
Мастачка не прыдумляе сюжэт і не спяшаецца даваць назвы творам. Яна стварае мастацтва, якое здольна завабіць гледача і прымусіць ствараць вольныя інтэрпрэтацыі формаў, сюжэтаў, аб'ектаў і рытмаў.
Лічыць важнымі аспектамі асабістае знаёмства і наведванне яе майстэрні. 
З 24 снежня 2022 мастачка працуе і прымае гасцей у сваёй вясковай майстэрні - "Галерэі Лепей", якая знаходзіцца ў вёсцы Чаросава, Лепельскага раёна, Віцебскай вобласці.
Работы мастачкі знаходзяцца ў прыватных калекцыях ЗША, Германіі, Англіі, Шатландыі, Аўстрыі, Японіі, Фінляндыі, Грэцыі, Ізраіля, ААЭ, Літвы, Польшчы, Беларусі.
Мастачка з'яўляецца ўдзельніцай асабістых і групавых выстаў у Беларусі і за мяжой з 2017 г.
Адукацыя: студыя народнай творчасці Рышарда Мая 2018-2019 г.г.

Каб больш падрабязна азнаёміцца з творчасцю мастака - наведайце яе інтэрнет старонку сайта.